De Plattdüütsche Raat för Sleswig-Holsteen
warrt orrig wat jünger

Överall in't Land fallt dat op: De Regionaalspraak Nedderdüütsch is nich mehr bloots för ole Lüüd. Platt snacken hett wedder Wind in de Seils — in 30 Grundscholen un in 7 högere Scholen steiht de nöördliche Tungslag meddewiel fast op'n Stunnenplaan. Junge Lüüd speelt Theater op Platt, singt plattdüütsche Texte to ehr Musik orr sünd as Poetry Slammer togangen.
Ok wat de Gremien sünd, dor kannst dat sehn: In'n Utschuss för Nedderdüütsch un Freesch vun'n Sleswig-Holsteenschen Heimatbund packt junge Lüüd mit an, de Spraak för de Tokumst klaartomaken.

Ok so in'n annerletzt nieg wählten "Plattdüütschen Raat för Sleswig-Holsteen". He vertridd de Saak vun de plattdüütschen Minschen in Politik un Sellschap un bi offitschelle Anlaaten. In de sösste Wahlperiood, de se nu tofaten hebbt, will de 28jöhrige Florian Kruse mit veel Elan för sien Moderspraak mitdoon. De tokünftig Lehrersmann steiht ok as plattdüütsche Darsteller op de Böhn un is Liddmaat in'n Vörstand vun'n Landslandjöögdverband. Nieg in'n Raad is ok de plattdüütsche Schrieversfru Gunda Gey, de liekerwies de niegen Opgaven mit veel frische Infäll anpackt. Un achter de twee staht de fief Kolleg*innen, de al een orr mehr Amtsperioden lang dorbi sünd — Marianne Ehlers, Heiko Gauert, Truels Hansen, Frauke Sander un Heike Thode-Scheel.

In ehr konstituieren Sitten in't Landshus Kiel woorn wählt: In't Sprekeramt beropen sünd in düsse Periood Truels Hansen un Marianne Ehlers, Heike Thode-Scheel schall wiederhen för de Regional- un Minnerheitenspraken in'n Medienraad vun'e Medienanstalten Hamburg/Schleswig-Holstein sitten un opto ok in'n Biraad för den Apen Kanaal Kiel.
All 7 Liddmaten sünd dör ehr Amt in'n Biraad för Nedderdüütsch bi'n Sleswig-Holsteinischen Landdag un arbeidt ok in de doren Arbeitsgruppen AG Bildung un AG Medien mit.
De niegen Delegeerten för Sleswig-Holstein in'n Bundsraat för Nedderdüütsch warrt vun Sommer 2018 an de olen ween: Heiko Gauert un Marianne Ehlers.
De Geschäftsföhren löppt siet de eerste Amtsperiood över den Sleswig-Holsteinischen Heimatbund.

"Wir freuen uns auf eine gute und positive Zusammenarbeit mit allen Netzwerkern für die Sprache im Lande", so Spreker Truels Hansen. Un de BfN-Delegierte Heiko Gauert sett dorto: "Im Vergleich mit den anderen Bundesländern des Nordens stehen wir sehr gut da. Und dennoch: für die Sprache bleibt viel zu tun. Gerade in den Bereichen Bildung, Kultur und Medien werden wir am Ball bleiben und unsere Stimme für alle Plattsprecher hören lassen!"

Marianne Ehlers, Sprecherin
Truels Hansen, Sprecher


Wat de Plattdüütsche Raad för Rull in't Tosamenspeel vun Instituschoonen för de nedderdüütsche Kultur un Spraak speelt, köönt Se in düt Diagramm sehn.

Wichtige Opgaven vun'n Raad sünd:

  • politisch för de Nedderdüütschen un dat Nedderdüütsche instahn
  • klormaken, wa nödig spraakpolitische Arbeit deit
  • rutkriegen, wat een doon kann, un de nödigen Lü dorto ut all Kanten to'n Tosamenwarken bringen
  • den Bestand vun't Nedderdüütsche klareern
  • Qualität sekerstelln hölpen
 
 
 
 

 

Datenschutzhinweise